Башҡортостанда коронавирус инфекцияһын йоҡтороу осрағы юҡ

Был хаҡта Республика Хөкүмәте Премьер-министрының беренсе урынбаҫары Андрей Назаров коронавирус инфекцияһының таралыуын булдырмау буйынса оператив штаб ултырышында белдерҙе, тип хәбәр итә «Башҡортостан» гәзите сайты.

Башҡортостан буйынса баш санитар табип урынбаҫары Галина Пермина белдереүенсә, республикала ғинуарҙан алып эпидемияға ҡаршы саралар комплексы ойошторолған. Ҡытайҙан Башҡортостан еренә аяҡ баҫҡан һәр кем ентекле тикшеренеү үтә, сир осраҡтары асыҡланмаған. Мәскәүҙә бер сирле менән бәйле, сит илдәрҙән килеүсе кешеләрҙең сәләмәтлек торошо тикшерелә, 14 көн дауамында күҙәтеү аҫтында булалар, әгәр хәүефле сир билдәләре күренһә, уларҙы ашығыс рәүештә дауаханаға оҙатасаҡтар.

– Беҙ табиптарҙы коронавирусты дауаларға өйрәтәбеҙ, дауалау учреждениеларында уҡыуҙар ойошторабыҙ. Бөтә дауаханалар ҙа тейешле ҡорамалдар, препараттар, һаҡланыу саралары менән тәьмин ителгән, – тине һаулыҡ һаҡлау министры Максим Забелин.

Ултырышта 100 меңлек һаҡланыу битлектәре запасын булдырырға ҡарар ителде. Дарыуханаларҙа битлек һатыуҙа ығы-зығы тыуҙырмау, уларҙың хаҡын арттырмау өсөн дә уяулыҡты юғалтмаҫҡа, күҙәтеү алып барырға кәрәк.

– Донъялағы хәлдән сығып, коронавирус ваҡиғаһының тиҙ генә тамамланасағына иҫәп тоторға ярамай, – тип билдәләне Андрей Назаров. – Беҙ, ваҡиғаның нисек барыуына ҡарамаҫтан, әҙерләнергә, иҡтисадта көрсөккә ҡаршы саралар ҡабул итергә тейешбеҙ. Ҡытай тәжрибәһе шуны иҫбатлай.

”Һаулыҡ һаҡлау” милли проектына ярашлы, халыҡты төрлө йоғошло сирҙәрҙән аралау, үлем осраҡтарына юл ҡуймау, кеше һанын һаҡлау ҙур бурыстарҙың береһе.

Фото: Башҡортостан һаулыҡ һаҡлау министрлығы.

#национальныепроекты#нацпроекты
#региональныепроекты#регпроекты#нацпроектыБашкортостан