National Interest Путиндың Икенсе донъя һуғышы тураһында мәҡәләһен баҫты

Рәсәй Президенты Владимир Путин Икенсе донъя һуғышы тамамланыуға 75 йыл тулыуға арналған мәҡәлә яҙған. Материал Американың The National Interest журналында баҫылды, тип хәбәр итә РИА Новости.

Дәүләт етәксеһе фашизмды тар-мар итеүҙә Советтар Союзының ролен үҙгәртергә маташҡан күп кенә Европа сәйәсмәндәре менән ситтән тороп бәхәскә ингән. Ул СССР менән Германия араһында 1939 йылдың 23 авгусында ҡул ҡуйылған һөжүм итмәү тураһындағы пактты һуғыш башланыуҙың сәбәбе, тип иҫәпләү ғәҙел булмауын һыҙыҡ өҫтөнә ала. Хәрби хәрәкәттәр башланыуға шулай уҡ Мюнхен килешеүе килтерҙе, уға ярашлы, Чехословакия Германияға Судет өлкәһен бирергә тейеш булған, тип билдәләй Путин. Ул яҙыуынса, Икенсе донъя һуғышы башланыуға көнбайыш державаларының Беренсе донъя һуғышынан һуңғы сәйәсәте лә сәбәпсе булған.

Рәсәй етәксеһе фекеренсә, һуғыш башланыу тарихы менән ғалимдар шөғөлләнергә тейеш. Ул кемделер аҡлап йәки ғәйепләп, үҙенә судья ролен алырға йыйынмай.

Фото: РИА Новости / Алексей Никольский.