Табип-яҙыусы ХӘЙҘӘР ТАПАҠОВТАН кәңәштәр

Дуҫтарым! Әйтерем һаман да шул короновирус хаҡында.Мин бит медицина хеҙмәткәре, кәңәшемә ҡолаҡ һалығыҙ. Хәлдәр шәптән түгел. Мәскәү мәғлүмәттәре һеҙҙе вайымһыҙлыҡҡа һалмаһын, сөнки ул үҙәктә һәм алыҫта ята. Беҙҙәге күрһәткестәр ҙә үтә шартлы: короновирус кәмей, ә бына пневмония, республикала үткән йыл менән сағыштырғанда 6 тапҡырға артып киткән. Ул да шул уҡ йоғошло бер сирҙең сығанағы, туберкулез тыуҙырыусы Кох таяҡсалары һымаҡ.Тыуған ауылым Һабырҙа хәлдәр шәптән түгел, сирләүселәр күп. Көн һайын шылтыратып хәлдәрен беләм, кәңәштәремде бирәм, ҡулымдан килгәне шул ғына, башҡа сарам юҡ. Сир башҡа ауылдарға таралып китмәһен, тип шөбһәләнәм. Ауылдарҙа хәлдәрҙе, күреп беләһегеҙ бит, һөйләп тораһы түгел. Был осраҡта нимә кәңәш итә алам:

1. Яҡындарығыҙҙы, туғандарығыҙҙы, балаларығыҙҙы, үҙегеҙҙе һаҡлағыҙ, ҡурсалағыҙ.

2. Ҡунаҡ- йыйындарҙы, аралашыуҙарҙы, хәл- әхүәлләшеүҙәрҙе сикләгеҙ, байрам итергә өлгөрөрһөгөҙ.

3. Йәмәғәт урындарына сыҡһағыҙ битлек, бирсәткә кейегеҙ, арауыҡ һаҡлағыҙ.

4. Ҡулдарығыҙҙы, биттәрегеҙҙе, танау тишектәрен урамда йөрөп ингәндән һуң хужалыҡ һабыны менән эшкәртегеҙ, йыуығыҙ.

5. Көнөнә өс тапҡыр өс тырнаҡ һарымһаҡ ашағыҙ, суҡлы әрем төнәтмәһен уртлап эсеп йөрөгөҙ.

6. Йортоғоҙҙа даими рәүештә артыш төтәтеп алығыҙ.

7. Тамаҡтарығыҙ, тын юлдарығыҙ әсеттереп торһа, температурағыҙ булмаған осраҡта, бөркәнеп аш содаһының, әрсемәй бешерелгән картуфтың быуын тирләгәнсе еҫкәгеҙ.

8. Ишек тотҡаларын, иҙәнде "Белизна" менән һөртөп һәм йыуып алығыҙ, сөнки ул шыйыҡсала хлор ҡатнашмаһы бар.

Короновирус ҡасандыр беҙҙе баҫып алған Колорада ҡуңыҙы ише китмәҫ өсөн килде, ошо ауыр шарттарға теләйһеңме быны, әллә юҡмы, өйрәнергә һәм күнергә ҡала. Халыҡ медицинаһын ҡулланғанда медицина сикләүҙәрен дә онотмағыҙ, сөнки кеше организмы бер иш түгел.Әгәр мәле етеп прививка һалырға тәҡдим итһәләр, баш тартмағыҙ, һәр мөмкинлектән файҙаланып ҡалырға кәрәк, чип тураһында хәбәр ҡуйыртыуҙары, прививкаларҙың зыяны хаҡындағы кире һаплауҙар бары әкиәт кенә. Рәсәйҙә, башҡа илдәр менән сағыштырғанда ауырыу осраҡтары түбән, сөнки беҙгә бала саҡта БЦЖ прививкаларҙың яһағандар ине бит, ҡайһылары кимәлдә ана шул сара халыҡты һаҡлап алып ҡалды. Интернеттағы имеш-мимештәргә, телевидениеларҙағы урынһыҙ шау-шыуға ышанып бармағыҙ, ауырыу хаҡында уйламағыҙ, һәр хәлдә уйламаҫҡа тырышығыҙ, сөнки күңел төшөнкөлөгө насар юлдаш. Ябай ғына юлдар һәм алымдар тәҡдим итәм, бәлки файҙаһы тейер. Һәммәгеҙгә лә сәләмәтлек теләйем, имен-аман йәшәгеҙ!