Радий Хәбиров менән Олег Гриднев Республика онкодиспансерының яңы корпусын асты

Бөгөн Өфөлә Республика клингик онкологик диспансерының хирургия корпусын асыу тантанаһы үтте. Сарала Башҡортостан Башлығы Радий Хәбиров һәм Рәсәй Федерацияһы һаулыҡ һаҡлау министры урынбаҫары Олег Гриднев ҡатнашты.

БР Башлығының матбуғат хеҙмәте хәбәр итеүенсә, туғыҙ ҡатлы яңы корпуста бер сменала 450 кеше ҡабул итеүгә иҫәпләнгән поликлиника һәм 240 урынлыҡ стационар урынлашҡан. Бында юғары квалификациялы 250 хеҙмәткәр, шул иҫәптән төрлө белгеслектәрҙәге 68 табип эшләйәсәк. Дүшәмбелә, 10 августа, үҙәк тәүге пациенттарын ҡабул итәсәк тә инде.

Объектты төҙөү 2017 йылдың авгусында башланғайны. Проекттың дөйөм хаҡы 2 млрд һум. Комплекс иң юғары кимәлдә медицина ярҙамы күрәһәтергә мөмкинлек биргән заманса ҡорамалдар менән йыһазландырылған.

Фото: glavarb.ru