14 районда ғәҙәттән тыш хәл индерелде

Башҡортостан Башлығы Радий Хәбиров республиканың 14 районында, шул иҫәптән Ейәнсурала ғәҙәттән тыш хәл режимы индерҙе. Ярашлы бойороҡ республиканың хоҡуҡи мәғлүмәт порталында баҫтырылды.

Документта әйтелеүенсә, ғәҙәттән тыш хәл режимы 2020 йылдың июлендәге ҡоролоҡтоң һәм ҡоро елдәрҙең ауыл хужалығы сәсеүлектәренә зыян килтереүенә бәйле индерелгән. Ғәҙәттән тыш хәл 1 августан 20-һенә тиклем Әбйәлил, Баймаҡ, Бөрйән, Ғафури, Ейәнсура, Йылайыр, Ишембай, Ҡырмыҫҡалы, Көйөргәҙе, Мәләүез, Салауат, Стәрлебаш, Учалы райондарында һәм Күмертау ҡалаһында индерелә.

Республика етәксеһе Ауыл хужалығы министрлығына – ауыл хужалығы культуралары һәләк булыуынан сығымдарҙы ҡаплауға документтар әҙерләргә, райондар хакимиәттәренә ярашлы саралар күрергә ҡушты.