Әбүләйестә үткән бала саҡ

... Был ҡышта Банаттың иҫендә ҡалған тағы ла бер ваҡиға булды. Ауылдағы бәләкәй ҡыҙҙарҙың барыһының да тиерлек баштары ҡутырлап сыҡты. Ҡыҙҙарҙың баштары бик ныҡ ҡысыта башлай, шунан һуң яра тырналып бөткән урында һап-һары булып шеш сыға ла аға, аҙаҡ ҡалын ҡутыр менән ҡаплана. Нисек итеп был сирҙе дауаларға белмәгән әсәйҙәр ҡыҙҙарының сәстәрен, малайҙарҙыҡы кеүек итеп, тап-таҡыр итеп ҡырып, утҡа яҡтылар. Банаттың иҫендә: бына уның бөҙрә һары сәстәре бөгәрләнә биреп мейестәге утта яна, өйҙә янған сәс еҫе таралды. Аҙаҡтан баш кер һабыны менән яҡшылап йыуылды, шунан һарыҡ тиреһенән башты ҡапларлыҡ киҫәкте ҡырҡып алып, яҡшылап йылы һыуҙа ебетеп, кер һабыны менән күпертеп һабынланылар ҙа, Банаттың тап-таҡыр башына бәйләп ҡуйҙылар төнгөлөккә. Иртән торғас теге тире киҫәген баштан ҡутыры-маҙары менән ҡуптарып алдылар ҙа: "Баш тиреһе таҙарған, оҙаҡламай терелер!" – тинеләр. Бер-нисә көн ҡыҙыҡайҙы урамға уйнарға сығармай өйҙә тоттолар. Баштағы яралар аҡрынлап төҙәлде. Баланың башына аҡ яулыҡ бәйләп ҡуйҙылар. Иҫендә Банаттың: бер уның башында ғына түгел аҡ яулыҡ, ә барса уның менән бергә уйнаған әхирәттәрендә лә. Оҙаҡламай яулыҡ та төштө баштан, тик көҙгө алдына баҫтырылған ҡыҙыҡай ғына үҙен башта танымай торҙо, сөнки уның һары бөҙрә сәстәре урынына ниндәйҙер ҡуйы һоро, шып-шыма сәс үҫеп сыҡҡайны...