Юғары уҡыу йорттарында бюджет урындары 1,5 меңгә артҡан

Башҡортостан юғары уҡыу йорттарында бюджет урындары 2019 йыл менән сағыштырғанда 1,5 меңгә артҡан һәм быйыл уларҙың һаны 11 меңдән күберәк тәшкил итә. Был хаҡта республика Башлығы Радий Хәбиров үҙенең социаль селтәрҙәрҙәге биттәрендә хәбәр итте, тип яҙа “Башинформ” агентлығы.

“Үҙебеҙҙең вуздарҙа студенттар өсөн бюджет урындары һанын 11 747-гә тиклем арттырҙыҡ (был былтырғынан 1556-ға күберәк). Быны ихтыяж иң ҙур булған йүнәлештәр буйынса эшләй алдыҡ”, – тип яҙҙы Башлыҡ.

Төбәк етәксеһе киләһе йылда бюджет урындары һанын 13 785-кә тиклем еткереү планлаштырылыуын билдәләп, “Беҙҙең егеттәр-ҡыҙҙар бында – тыуған республикала уҡырға тейеш. Бер үк ваҡытта буласаҡ белгестәр Башҡортостанда, өйҙә ҡалһын өсөн эш урындарын арттырыу өҫтөндә эшләйбеҙ”, – тип һыҙыҡ өҫтөнә алды Башлыҡ.