Ҡазанда Башҡортостандың халыҡ шағиры Мостай Кәримгә һәйкәл асылды

Бөгөн Ҡазанда Мостай Кәрим исемендәге скверҙа, Ырымбур тракты һәм Даура урамдары киҫелешендә Социалистик Хеҙмәт Геройы, Башҡортостандың халыҡ шағиры Мостай Кәримгә һәйкәл асыу тантанаһы булды. “Башинформ” хәбәр итеүенсә, тантанала Татарстан һәм Башҡортостан башлыҡтары Рөстәм Миңнеханов менән Радий Хәбиров ҡатнашҡан.

Скульптураның дөйөм хаҡы 45 млн һум тәшкил иткән. Ҡатмарлы композиция Урал тауҙары ташында ултырған шағирҙы һынландыра. Уның авторы – ил рәссамдры союзы рәйесе, Рәсәйҙең халыҡ рәссамы, скульптор Андрей Ковальчук. Уға Татарстан Президентының рәхмәт хаты тапшырылды. Радий Хәбиров һәйкәл авторын Башҡортостандың дәүләт наградаһы – Халыҡтар Дуҫлығы ордены менән бүләкләне.

Радий Хәбиров әйтеүенсә, һәйкәл ике республиканың Рәсәй именлеге хаҡына сәскә атыуы һәм алға хәрәкәтенең мәңгелек кәүҙәләнеше буласаҡ.

“Был монумент башҡорт һәм татар халҡының дуҫлығын тағы ла нығытыр”, - тине тантанала Татарстан башлығы Рөстәм Миңлеханов. Ул Башҡортостан Башлығы Радий Хәбировҡа рәхмәт һүҙҙәрен дә еткерҙе.