#Районға_90_йыл

Серекәй. Рәсми исеме — Мөхәмәтйән. 1754 йылдан алдараҡ нигеҙ һалынған.

Борон ауылдарҙа һәр мәсьәләне ауыл йыйынында хәл иткәндәр. Шу­лай йыйылыш барған саҡта сә­релдәк тауышлы бер кеше баш­ҡаларҙың һүҙен ишеттермәй, сә­бәләнеп сыр-сыу килә икән. Шул саҡ ситтән килгән бер кеше: "Торма әле тызылдап, серекәйгә оҡшап, би­мазалайһың" , – тигән. Ауылдың исеме шунан киткән, имеш.

Икенсе төрлө лә аңлатма бар. Йә­нәһе лә, ошо ергә бәләкәй генә, үҙе теремек, сәрелдәк тауышлы бер ба­бай килеп ултырған. Ауылды шул бабайҙың ҡушаматы менән "Се­рекәй" тип йөрөтә башлағандар.

1854 йылдың 7 апрелендә Ырым­бур генерал-губернаторына бирелгән үтенестә: "Әселе буйында айырым ауыл булып йөҙ йылдан артыҡ йә­шәйбеҙ. Ауылды таныуҙы, Мөхә­мәтйән тигән исем биреүҙе һорай­быҙ", — тип яҙылған. Шул уҡ йыл­дың 20 апрелендә генерал-губерна­тор Перовский уларҙың үтенесен ҡәнәғәтләндергән. Ул йылда ауылда 71 ир кеше теркәлгән.

1920 йылда 68 йортта 318 кеше йәшәгән. 1925 йылға 40 йорт ҡал­ған. 1939 йылда 117 ир, 169 ҡатын- ҡыҙ теркәлгән. 2000 йылда 40 йор­тта 156 кеше ғүмер иткән. Хәҙер 161 кеше йәшәй.