Башҡортостанда “Еңеү урманы” акцияһы ойошторола

“Йәшел Рәсәй” һәм “Урманды һаҡлайыҡ” бөтә Рәсәй акциялары сиктәрендә 26 сентябрҙә республиканың урман фонды территорияһында Бөйөк Еңеүгә 75 йыл тулыуға арналған “Еңеү урманы” акцияһы үткәрелә.

БР урман хужалығы министры урынбаҫары Венер Вахитов әйтеүенсә, ағастар ултыртыу урындары, яуаплы кешеләрҙең контакттары, үҫентеләрҙе ултыртыу ҡағиҙәләре Ауыл хужалығы министрлығының рәсми сайтында урынлаштырылған. Акцияла ҡатнашыусылар кәрәкле күләмдә ултыртыу материалы һәм инвентарь менән тәьмин ителәсәк.

Республика акцияһы йәштәр, йәмәғәт ойошмалары, ирекмәндәр һәм хеҙмәт коллективтары вәкилдәре ҡатнашлығында үтәсәк. Шул уҡ ваҡытта коронавирус таралыуын иҫкәртеү шарттарын үтәү мотлаҡ буласаҡ.

Ошо уҡ көндә республика муниципаль берәмектәрендә Геройҙар аллеяларына нигеҙ һалынсаҡ.