Луиза һәм Марат Хәйруллиндарға хөкөм ҡарары сығарылды

Башҡортостанда Салауат ҡала суды 2019 йылдың майында 25 миллион һум урлаған ирле-ҡатынлы Хәйруллиндарға хөкөм ҡарары сығарҙы, тип хәбәр итә “Башинформ”. Элекке кассир Луиза биш йылға дөйөм режимлы колонияға оҙатыла. Уның ире Марат алты йылға дөйөм режимлы колонияға хөкөм ителде. Уға суд залында уҡ ҡулына бығау кейҙерҙеләр. Бынан тыш, ғаилә урланған 25 миллион һумды банкка кире ҡайтарырға тейеш.

Суд залынан «Башинформ» агентлығы хәбәрсеһе хәбәр итеүенсә, экс-кассир иренең һорауы буйынса аҡсаны бүлеп алып сыҡҡан (биш меңдән 100 мең һумға тиклем). Ире бөтәһен дә казинола отторған. Юғалыр алдынан Луиза 1,5 миллион һум урлаған, ул ысын купюралар урынына ялғанын һалған. Хәйруллиндарҙың балалары ата-әсәһе ҡылған енәйәт тураһында телевизорҙан белгән, тиелә эш материалдарында.

Мараттың һүҙҙәренсә, ул ҡатыны менән юғары инстанцияға ялыу бирергә йыйына. Шулай уҡ ул журналистарға судтан ҡулына бығау кейҙереп алып китерҙәр тип көтмәгәнен әйтте. Луиза, үҙ сиратында, Салауат ҡала судының хөкөм ҡарарын ишеткәс, илап ебәрә.

Дәүләт ғәйепләүсеһе 25 миллион һум урлаған өсөн элекке кассирҙы – алты йыл йылға, ә уның ирен ете йылға төрмәгә ултыртыуҙы, шулай уҡ уларҙың бер йылға иркен сикләүен һорағайны.

Фото: Ксения Калинина / “Башинформ”.