“Зифа” һәм “Луч” кер йыуыу порошоктарын ҡабат етештерә башлаясаҡтар

Башҡортостан Башлығы Радий Хәбиров бөгөн “Башҡортостан сода компанияһының” элек «Зифа», «Эколь», «Луч» кер йыуыу порошоктары сығарылған, хәҙер ябылған цехында булды, тип хәбәр итә “Башинформ”. Завод вәкилдәре был цехты яҡын арала эшкә ебәрергә әҙер булыуҙарын белдерҙеләр һәм Хәбировтан ярҙам һоранылыр.

“БСК” АЙ-һының генераль директоры Эдуард Давыдов: “Порошок етештереү табышлы булһын өсөн беҙгә айына 500 тоннаға сығырға кәрәк. Нисек кенә булмаһын, бөтә билдәле порошоктар күпселек беҙҙең сеймалдан етештерелә”, – тип билдәләне.

Радий хәбиров предприятие сифатлы продукт етештерергә һәм уны конкурентлы хаҡ менән тәҡдим итергә тейешлегенә иғтибарҙы йүнәлтте. Республика халҡында был продукцияға ихтыяж буласағына ышаныс белдереп, үҙебеҙҙең яҡтан, һис шикһеҙ, Башҡортостан етештереүсеһенә ярҙам итәсәкбеҙ, тип яҙҙы республика етәксеһе үҙенең социаль селтәрҙәрҙәге битендә.