Иҫкәртеү тип ҡабул итергә кәрәк

Бөтә донъя әһәмиәтендәге әҙәби мираҫ дәрәжәһенә күтәрелгән бөйөк китап “Ҡөрьән Кәрим” сүрәләренең “Йа-син” сүрәһе Алланың Мөхәммәт ғәләһис-сәләмгә мөрәжәғәте тип ҡабул ителә. Дин белгестәренең фекеренсә, “Йа-син” хәрефтәренең мәғәнәһе тай диалектында “Йа инсану”, йәғни “И, кеше” йәиһә “и, камил кеше” тигәнде аңлата. Тәүге аятында шәхси бер кешегә өндәшһә, 3-сө һәм 4-се аяттарында “һис шикһеҙ, кешеләрҙе тура юлға әйҙәр өсөн күндерелгән пәйғәмбәр һин” – үҙенә йөкмәтелгән бурыс тураһында. Ә 6-сы аятта изге пәйғәмбәрҙең тәүге иҫкәртеүе. БЫНЫ БАРЛЫҠ ЙӘМҒИӘТТЕ ИҪКӘРТЕҮ ТИП ҠАБУЛ ИТЕРГӘ КӘРӘКТЕР. Был сүрәне мохтазирҙарға, мәрхүмдәргә уҡырға тәҡдим ителһә лә, сүрә башынан аҙағына ҡәҙәр тереләр өсөн яҙылған. Сүрә тереләрҙе иманға килеүгә, иманлы булырға өндәй. Ә иман – күркәм холоҡ, әҙәп һәм әхлаҡ ул. Әҙәм балаһы рухи камиллыҡ аша ғына үҙенә бирелгән ғүмерҙең төп бурысын ғәмәлгә ашыра алыуы тураһында. Күтәрелгән теманың мөһимлегенән сығып, был сүрәне “Ҡөрьәндең йөрәге” тип атайҙар. 6-сы аят: “Был китапты индереүҙең маҡсаты шул: ғәфләт йоҡоһонда ҡалған йәмғиәтте уятыу һәм иҫкәртеү ул”.Коронавирус эпидемияһы йәмғиәттең медицина өлкәһенә етерлек иғтибар биреп еткермәүен күрһәтте лә, иҫбатланы ла, аятта әйтелгәнсә, уятты ла шикелле...