Сибайҙа «Урал аръяғы тауышы» шоу-проекты старт алды

«Урал аръяғы тауышы» шоу-проекты республиканың мәҙәни тормошонда сағыу конкурс булып балҡыны һәм тамашасыларҙың, ҡатнашыусыларҙың йөрәген яуланы. Уникаль конкурста Урал аръяғының ғына түгел, тотош республиканың төрлө район һәм ҡалаларынан йырсылар ярышты. Ҡатнашыусылар остаздар, йырсы һәм вокал буйынса педагогтар менән эшләне. Бәйгенең беренсе еңеүсеһе 15 йәшлек Сибай ҡыҙы Елизавета Филиппова булһа, былтыр үҙенсәлекле тауышлы Учалы егете Раян Юнысов төп призға лайыҡ булды.

Сибайҙың брендына әүерелгән өсөнсө миҙгел дә ҡатнашыусылар күп булырына шик юҡ. Өлкәндәр араһындағы конкурс татамланыу менән йылдағыса “Урал аръяғы. Балалар тауышы”на ла старт биреләсәк. Беренсе конкурста Ксения Егупова еңеп сыҡҡайны. 2020 йылда коронавирус пандемияһына бәйле балалар араһында конкурс кисектерелде.

Ойоштороу комитетына заявкаларҙы 25 февралгә тиклем ебәрергә кәрәк. Шоу-проектта йыр-моңға һәләте булған һәр кем ҡатнашып, мөмкинлектәрен һынап ҡарай ала. Әйткәндәй, конкурс барышы Сибай телерадиотапшырыуҙар студияһы, Сәләм телеканалы һәм интернет селтәрҙәре аша киң ҡатламға сығасаҡ. Тик тере тауыштар яңғыраған сағыу тамашаны сибайҙар ғына түгел, бөтә республика һәм сит өлкәләрҙә йәшәүселәр ҙә ҡарай ала.

Конкурстың положениеһы менән Бәйләнештә селтәрендәге махсус төркөмдә танышырға мөмкин. “Урал аръяғы тауышы” шоу-проектында еңеүсене төп приз - 50 мең һум аҡса көтә.