Социаль хеҙмәткәрҙәр бүләкләнде

Халыҡҡа иң яҡын кешеләр. Пандемия осоронда йәмғиәт һулышын тойоп, уларҙың проблемалары, тормош мәшәҡәттәре, сәләмәтлеген дә яҡшы белгән кешеләр – ул социаль хеҙмәткәрҙәр. Башҡортостан юлдаш телевидениһы хәбәр итеүенсә, кисә уларҙың бер төркөмөнә фиҙәҡәр хеҙмәте өсөн дәүләт наградалары, маҡтаулы исемдәр тапшырылды.

Күптәр онлайн форматҡа күскәндә улар киреһенсә, офлайн эш алып барҙы. Коронавирус тигән дошман менән көрәштә алғы фронтҡа баҫты. Социаль хеҙмәткәрҙәр оло йәштәгеләр, мөмкинлектәре сикләнгәндәр, карантинға ябылғандар менән оло тормош араһында аралашсылар ролен үтәне. Үҙ сәләмәтлеген, ғаилә именлеген хәүеф аҫтына ҡуйып ҡурҡыныс вирус йоҡтороусылар менән осрашты.

Социаль учреждениеларҙа эшләүселәр пандемия башланыу менән табиптар кеүек үк вахта алымына күсә. Улар ҙа айҙар буйына ғаиләһен, туғандарын күрә алмай. Учалы психоневрология интернаты тәүгеләрҙән булып коронавирус таралып карантинға ябылған социаль учреждение. Фельдшер Раят Сәғәҙиев әйтеүенсә, хеҙмәткәрҙәр , щул иҫәптән үҙе, бергә эшләүсе тормош иптәше лә бер йылға яҡын өйҙәренә лә ҡайтҡандары булмаған.

Йәшәйештең күп кенә тармаҡтары пандемия шарттарында эш форматын үҙгәртергә мәжбүр булһа, социаль өлкә тәүмаҡсаттан тайпылманы. Ләкин эш күләме шаҡтай артты, ти ведомство етәксеһе Ленара Иванова. Яңы барлыҡҡа килгән түләүҙә, пособиелар эш күләмен өҫтәне генә. Халыҡтың именлеге, йәмғиәттә һаҡланған тыныслыҡ та тап социаль хеҙмәткәрҙәр ҡаҙанышы.

Бындай хеҙмәт юғары баһаға лайыҡ. Йөҙгә яҡын социаль хеҙмәткәрҙәр маҡтаулы исемдәр, дәүләт наградалары менән билдәләнде. Әйткәндәй, рәхмәт хаттарын , почет грамоталарын социаль өлкә генә түгел, мәғариф, һаулыҡ һаҡлау, Роспотребнадзор һәм башҡа ведомстволар тапшырҙы. Был иһә социаль хеҙмәткәрҙәрҙең һәр өлкәлә лә мөһим эш башҡарыуы тураһында һөйләй.

Бер йыл эшмәкәрлеккә йомғаҡ яһау пандемия тамам тигәнде аңлатмай. Алда беҙҙе нимә көтөрөн береһе лә белмәй. Шуға күрә социаль хеҙмәткәрҙәрҙәргә тынысланырға ярамай, тине Ленара Иванова. Сынығыу алған хеҙмәткәрҙәрҙән тағы ла ойошҡаныраҡ эш талап ителә.