Рамаҙан айы аҙыҡ-түлеккә хаҡ артыуын кәметкән

Апрелдә Башҡортостанда аҙыҡ-түлек инфляцияһы 1,2 процент пунктҡа 6,4 %-ҡа тиклем яйлаған, тип хәбәр итә “Башинформ”. Бында малсылыҡ продукттарына ихтыяж кәмеүе төп факторҙарҙың береһе булып торған. Шулай уҡ йәшелсәгә, емеш-еләктәргә, ярмаға һәм йомортҡаға хаҡтар динамикаһы ҙур өлөш индергән.

БР Милли банкы эксперты Алмаз Ғабдуллин әйтеүенсә, быйыл Рамаҙан айы һәм православныйҙарҙың посты бер осорға тура килгәнлектән көндәлек рациондағы ҡайһы бер аҙыҡ-түлеккә ихтыяж кәмеүе күҙәтелгән. Макарондарға һәм ярмаға хаҡтар артыуының яйлауы инде былтыр коронавирусҡа бәйле оҙаҡ һаҡланыусан продукттарға хаҡтар ҡапыл артыуының эҙемтәһе булып тора.

Бынан тыш, 2020 йыл яҙында импорт кәмегәнлектән күп кенә йәшелсәләргә һәм емеш-еләктәргә хаҡтар ныҡ артҡан. Һөҙөмтәлә быйыл арелдә уларҙың һиҙелерлек арзанайыуы күҙәтелгән.

Дөйөм йыллыҡ инфляция республикала 5,1 %-ҡа тиклем яйлаған. Ҡулланыусылар хаҡтары индексы төбәктә Волга буйы федераль округындағы (5,7%) һәм Рәсәйҙәге (5,5%) уртаса күрһәткестән түбәнерәк.