Ейәнсура районында 43 шишмә төҙөкләндерелгән

МР хакимиәте башлығы Дәмин Юланов шишмәләрҙе төҙөкләндереүҙә ҡатнашыусыларға рәхмәт белдерҙе.

Дәмин Марат улы социаль селтәрҙә Ейәнсурала бына өсөнсө йыл инде үткәрелгән “Муниципаль райондың иң яҡшы шишмәһе” конкурсы сиктәрендә ауыл биләмәләре 43 шишмәне төҙөкләндереүе тураһында яҙҙы.

“Бындай изге йола, күңелле миссия ауыл кешеләрен берләштерә. Һәр кем – олоһо ла, кесеһе лә был изге эшкә үҙ өлөшөн индерергә тырыша. Был йәш быуын өсөн бик яҡшы өлгө”, – тип яҙҙы район етәксеһе.

Ул шулай уҡ конкурста ҡатнашыусыларға, тәбиғәт байлығыбыҙ – шишмәләрҙе тергеҙеү өсөн көс һалыусыларға ҙур рәхмәт белдереп, тәбиғәтте ҡәҙерләргә, шишмәләрҙең һаҡланыуы тәьмин итергә саҡырҙы. Халыҡ аҡылы әйтеүенсә: “Шишмә – эсәр һыу сығанағы ғына түгел, ул – беҙҙе үткәндәр менән дә, киләсәк менән дә бәйләүсе тере сылбыр” тип яҙҙы башлыҡ.