Башҡортостанда яңы түләмдәргә ғаризалар ҡабул ителә башланы

Ғаризаны дәүләт хеҙмәттәре порталында йәки йәшәгән урын буйынса Пенсия фондының клиент хеҙмәтендә бирергә мөмкин.

Республикала ауырлы ҡатындарға һәм 8 йәштән 17 йәшкә тиклемге балалары булған ғаиләләргә яңы түләмдәр түләүгә ғаризалар ҡабул ителә, тип хәбәр иттеләр республика Пенсия фонды бүлегендә.

Яңы түләмдәр 8-ҙән 17 йәшкә тиклемге балалар тәрбиәләгән яңғыҙ әсәйҙәргә йәки атайҙарға һәм иртә срокта иҫәпкә торған ауырлы ҡатындарға түләнә.

Пособие күләме Башҡортостандағы йәшәү минимумына бәйле. Тулы булмаған ғаиләләр уны – бала өсөн йәшәү минимумының, йөклө ҡатындар өлкән кеше өсөн йәшәү минимумының 50 %-ы күләмендә аласаҡ. Шулай итеп, ул яңғыҙ ата-әсәле ғаиләләр өсөн һәр балаға – 5038,50 һум, ә ауырлы ҡатын-ҡыҙға 5320,50 һум тәшкил итә.

Пособие алыр өсөн ғаиләнең килеме йән башына йәшәү минимумынан артырға тейеш түгел.