Ике кеше урманда аҙашҡан

Һуңғы тәүлектә республиканың Ғәҙәттән тыш хәлдәр буйынса дәүләт комитеты ҡотҡарыусылары урманда юғалған ике ирҙе эҙләргә сыҡҡан, тип хәбәр итә “Башинформ”. 13 июль кисендә 62 йәшлек ир Нуриман районы Ҡыҙыл шишмә ауылы янындағы урманда аҙашҡан. Ведомствонан хәбәр итеүҙәренсә, төндө ул кеше йөрөмәгән ерҙә үткәргән. 14 июлдә иртән ҡотҡарыусылар уны Павловка ауылында тапҡан.

Икенсе осраҡ иһә Белорет районында теркәлгән. 52 йәшлек ир туристар менән йылға буйлап сәйәхәткә сыҡҡан һәм ялға туҡтаған ваҡытта урманда йөрөп килмәксе булған.

«Уның менән бәйләнеш бар ине, шуға эҙләү уңышлы тамамланды. Ҡотҡарыусылар туристы Белорет ҡалаһына оҙатып ҡуйҙы», — тип хәбәр иттеләр дәүләт комитетының матбуғат хеҙмәтенән.

Уҙған аҙнала ҡотҡарыусылар хеҙмәтенә урманда аҙашҡан кешеләр тураһында 11 хәбәр килгән. Юғалғандарҙың бөтәһе лә иҫән-һау табылған.