Радий Хәбиров «Өфө – Хеҙмәт батырлығы ҡалаһы» стелаһына сәскәләр һалды

Тантанала республика Хөкүмәте ағзалары, Дәүләт Йыйылышы – Ҡоролтай депутаттары, ҡала хакимиәте, министрлыҡтар һәм ведомстволар, Өфө предприятиелары вәкилдәре, шулай уҡ ветерандар, хеҙмәт династиялары, йәмәғәт ойошмалары вәкилдәре ҡатнашты.

Башҡортостан Башлығы республика халҡын байрам менән ҡотланы, яҡташтарыбыҙҙың Бөйөк Ватан һуғышында еңеү хаҡына батырлығының әһәмиәтен билдәләне.

– Ошо көндәрҙә беҙ тылда еңеү яулағандарҙың барыһына ла хәтер бурысын йөкмәтәбеҙ һәм уларға ҙур рәхмәт әйтәбеҙ, – тине ул үҙ сығышында. - Быйыл республикабыҙ өсөн шатлыҡлы ваҡиға булды. Рәсәй Президенты указы менән Ишембай ҙа "хеҙмәт батырлығы ҡалаһы" тип иғлан ителде.

Билдәле Обухов-Самойловтар хеҙмәт династияһы  вәкиле Сергей Обухов республика етәкселегенә, еңеү көнөн яҡынайтыусыларға рәхмәт әйтте һәм быуындар күсәгилешлегенең мөһимлеген һөйләне. Был династия Өфө мотроҙар эшләү производство берекмәһе - илдәге авиация двигателдәре эшләү флагманы менән бәйле. Улар араһында Бөйөк Ватан һуғышы ветерандары, инженерҙар, рационализаторҙар, остаздар бар.

Башҡортостан Башлығы шулай уҡ «Өфө – Хеҙмәт батырлығы ҡалаһы» стелаһы янында йәмәғәт киңлегенең үҫеше менән танышты. Бында, атап әйткәндә, М -105пф авиация двигателе ҡуйыла, уны 1940-сы йылдарҙағы ватан истребителдәре йыһазландыра. Был Бөйөк Ватан һуғышының иң күп һанлы моторы була. 1942 йылдан 1945 йылға тиклем Өфөлә 35 меңдән ашыу ошондай агрегат етештерелә. Бынан тыш, майҙансыҡта Башҡортостан сәнәғәте тармаҡтарын үҫтереү символы булараҡ нефть һурҙырғыс һәм карап якорҙары ҡуйылды.

Гөлнур Ҡыуатова.