Айыуҙар кешеләрҙе ҡурҡытҡан

Башҡортостанда «Шүлгәнташ» дәүләт ҡурсаулығының музей-экскурсия комплексында хеҙмәткәрҙәр өсөн айыуҙарҙы күҙәтеү төнө үткән.

“Беҙ кискеһен килеп, күҙәтеү өсөн урындар алдыҡ. Күргәндәребеҙ беҙҙең көтөлгәнде уҙып китте – айыуҙар күберәк булып сыҡты, улар иң кәмендә өсәү ине. Беҙҙең алда хәҙер еңел булмаған бурыс тора – айыуҙар кешеләрҙән ҡурҡмай, уларҙы өркөтөү ваҡытлыса ғына һөҙөмтә бирә. Һуңынан хайуандар яңынан килеп сыға һәм ҡунаҡ йорттарына, ҡалдыҡтар һалынған контейнерҙарға һәм умарталарға бара. Йыртҡыстар ҡунаҡтарҙы һәм хеҙмәткәрҙәрҙе ныҡ ҡурҡыта, улар ҡараңғыла бүлмәләрҙән сығырға ҡурҡа. Яңыраҡ төндә бер йәнлек күрше биләмәләге ҡаты көнкүреш ҡалдыҡтары йыйыу майҙансығына яҡынлашты, ҡунаҡхана хеҙмәткәрҙәрен ҡурҡытты. Икенсеһе, сүп-сар контейнерҙарын ауҙарып, ҡурсаулыҡ территорияһында аҙыҡ эҙләй, ҡоролмаларҙан 100 метр алыҫлыҡта болонда йөрөй. "Енәйәт урынын" тикшергәндән һуң, беҙ, тайыш табандар ҡарбуз һәм ҡауын ҡалдыҡтарын яратыуын һәм тәү сиратта, уларҙы эҙләүен асыҡланыҡ», – тип хәүефтәре менән уртаҡлашты «Шүлгәнташ» дәүләт ҡурсаулығы директоры Михаил Косарев.