Пенсионерка «ФСБ хеҙмәткәре»нә ышанып, ике млн һумдан ҡолаҡ ҡаҡҡан

Өфөнән 73 йәшлек пенсионер ҡатын телефон мутлашыусылары менән аралашҡандан һуң ике миллион һум аҡсаһын юғалтҡан.

Башҡортостан Эске эштәр министрлығы мәғлүмәттәре буйынса, ҡатынға тәүҙә элекке хеҙмәттәше исеменән хәбәр килгән. Унда, йәнәһе, уның менән хоҡуҡ һаҡлау органдары хеҙмәткәре бәйләнешкә инәсәк, ул шикле банк күсереүҙәре менән бәйле һорауҙар бирәсәк, тип әйтелә.

Бер аҙҙан пенсионеркаға үҙен ФСБ хеҙмәткәре тип таныштырған ир шылтыратҡан. Ул, ҡатынға сит ойошма ихтыяждарына аҡса күсерергә маташҡан өсөн енәйәт яуаплылығы янай, тип белдерә. Ҡатын быны эшләмәүен әйткәс, уға тәфтишселәр менән хеҙмәттәшлек итергә тәҡдим итәләр. Бының өсөн бөтә тупланмаларҙы «хәүефһеҙ иҫәпкә» күсерергә кәрәк була. Пенсионер ҡатын, күрһәтмәләргә ярашлы, бөтә булған 2 миллион һумдан ашыу аҡсаһын күсерә.

Полиция хеҙмәткәрҙәре енәйәт эше ҡуҙғатҡан.