Аңлап ҡабул итегеҙ!

Республика Башлығы Радий Хәбировтың Указына ярашлы, бөгөндән, йәғни 12 сентябрҙән сауҙа үҙәктәренә коронавирус инфекцияһынан вакцина яһатыу тураһындағы сертификат, ярты йыл элек сир үткәреү тураһындағы белешмә йәки ПЦР-тесҡа кире һөҙөмтәһе булғандар ғына индерелә. Ейәнсура районында ҙур сауҙа үҙәктәре юҡ, шулай ҙа коронавирис таралыуына юл ҡуймау йәһәтенән ниндәй саралар күрелә?

– Әлеге ваҡытта ковидҡа ҡаршы тыйыуҙар, сикләүҙәр ҡулланыу – пандемиянан сығыуҙың берҙән-бер юлы. Ауыл магазиндарында халыҡ күпләп йыйылмай һәм ҙур сауҙа үҙәектәрендәге кеүек сараларҙы ҡулланыу талап ителмәй. Шулай ҙа эшкә килгән һәр һатыусының температураһы тикшерелә. Ә һатып алыусыларға килгәндә, уларҙан битлек режимын үтәүҙәрен һорайбыҙ. Бығаса, бәлки, битлекһеҙ килеп, әйбер һатып алыу мөмкин булғандыр. Әммә хәҙер был йәһәттән талап ҡәтғиләшә. Битлеге булмаған бер кем дә хеҙмәтләндерелмәйәсәк! – тине Ейәнсура РайПО рәйесенең сауҙа буйынса урынбаҫары Вадим Зәкир улы Ғайнанов һәм райондаштарҙы был талапты аңлап ҡабул итеүҙәрен һораны.