Һуңғы тәүлектә тағы 35 кешенең ғүмере өҙөлгөн

Һуңғы тәүлектә Башҡортостанда 662 кеше COVID-19-ға ыңғай тест алған. Был ауырыуҙы йоҡтороусыларҙың дөйөм һаны 13 октябргә 74 174 кеше тәшкил итә.

Дауахандарҙа 1087 кеше дауалана, шуларҙың 708-е 60 йәштән өлкән кешеләр. 51 пациенттың хәле ауыр, 22 сирле ИВЛ аппараты ярҙамына мохтаж.

Республикала 6 904 кеше өйҙә дауалана, шул иҫәптән 60+ категорияһына ҡараған 5 652 кеше.

Коронавирус һуңғы тәүлектә 35 кешенең ғүмерен өҙгән. Вафат булыусыларҙың дөйөм һаны 1982-гә етте, шуларҙың 1683-ө 60 йәштән өлкәндәр.

Башҡортостандың 1 354 619 кешеһе COVID-19-ҙан вакцинаның беренсе компонентын яһатҡан, 1 228 785 кеше вакциналауҙы тулыһынса (1-се һәм 2-се компонент) үткән.

Фото: “Башинформ”.