Махсус хәрби операция үткәрелгән биләмәгә айына ике тапҡыр ҙур ылау ебәреү планлаштырыла

Башҡортостан Башлығы Радий Хәбиров хөкүмәттең оператив кәңәшмәһендә бөгөн махсус хәрби операция үткәрелгән биләмәгә гуманитар йөк әҙерләп ебәреү өсөн республика координация үҙәген булдырыу тураһында бойороҡҡа ҡул ҡуйыуын хәбәр итте. Уны Башҡортостан Башлығы хакимиәте етәксеһе Максим Забелин етәкләй, тип яҙа “Башинформ”.

Гуманитар йөк йыйыу өсөн логистика үҙәге «Башсельхозтехника» предприятиеһында ойошторола. Ғаризалар йыйыу менән республика хөкүмәте шөғөлләнә.

«Махсус хәрби операцияла ҡатнашыусылар өсөн тауарҙарҙы һәм кәрәк-яраҡтарҙы логистика үҙәге аша ғына оҙатыуҙы маҡсатҡа ярашлы тип иҫәпләйем. Күңел ҡушыуы буйынса гуманитар ярҙам күрһәткәндәрҙең барыһына ла ҙур рәхмәт. Айына ике тапҡыр ҙур ылау ебәрергә иҫәп тотабыҙ», — тине Радий Хәбиров.

Башҡортостан Республикаһы Башлығы хакимиәте етәксеһе Максим Забелин һүҙҙәренсә, гуманитар йөк Башҡортостандың ирекле батальондары яугирҙәренә, мобилизацияланғандарға, шулай уҡ шефлыҡҡа алынған хәрби госпиталдәргә оҙатыла.