«ОЙЛТИММАШ» заводын яңыртыуға 2028 йылға тиклем 2,4 миллиард һум аҡса йүнәлтелә

 Предприятие «Күмертау» йылдам үҫеш биләмәһе резиденты булып тора һәм «Роснефть», «Газпром» һәм яғыулыҡ-энергетика комплексының башҡа компаниялары структуралары өсөн цистерналар һәм башҡа резервуар ҡорамалдары сығара.

Предприятиены модернизациялауҙың беренсе этабын 2022 йылдың майында «Инвестиция сәғәте» кәңәшмәһендә хуплайҙар. Инициатива республика булышлығында тормошҡа ашырыла. Заводты үҫтереүгә 2,1 миллиард һумдан ашыу инвестиция йүнәлтелгән.

Икенсе сират ҡеүәттәрҙе артабан реконструкциялауҙы күҙ уңында тота, был цистерналар һәм резервуарҙар сығарыуҙы арттырырға мөмкинлек бирәсәк. Проект шулай уҡ 2024 йылдың ғинуарында «Инвестиция сәғәте»ндә хуплана. Уға тағы ла 2,4 миллиард һум самаһы аҡса йүнәлтеп, 2028 йылда тамамларға планлаштыралар.

– «ОЙЛТИММАШ» заводында 440 кеше эшләй. Беҙ эшсе һөнәрҙәр белгестәрен – иретеп йәбештереүселәрҙе, слесарҙарҙы һәм һанлы программа менән идара итеү станоктары операторҙарын эшкә алыуҙы дауам итәбеҙ, – тип хәбәр итте Владимир Лавров.

Башҡортостан Башлығы предприятиены яңыртыу буйынса башланғыстарҙы юғары баһаланы.

– Беҙ яҡшы үҫеш темптарын күҙәтәбеҙ, һеҙгә республикала эшләү уңайлы булыуын күрәбеҙ. Был беҙҙе ҡыуандыра, – тине Радий Хәбиров. – Күмертауҙа күсмә «Сәнәғәт сәғәте» үткәрергә планлаштырабыҙ, унда производствоға ярҙам сараларын тикшерәсәкбеҙ.